為自己打打氣!!!

朝早起身同表妹仔佢地飲茶,之後就去左'寶福山'拜外公!拜完返到屋企都已經5點,因為全程都湊住表妹仔,俾佢左拖右拉,又俾佢撒嬌抱抱,所以好累了!!!
原本同gary約定一齊去陪亞grace,但今朝gary打黎話想早d去,之後返屋企陪媽媽食飯,所以佢去陪grace先!我返到屋企打俾grace,衰野竟然返左屋企打麻雀,真係俾佢激死!!!咁我咪買埋grace想食既曲奇餅出發去佢屋企,同gary交左更,上到屋企同grace成家人嘻嘻哈哈咁食左餐好餸飯,之後同佢,uncle & auntie一齊返醫院了!一路坐下傾下睇下電視,坐到差唔多9:30,隔壁婆婆要去'大大',咁我同grace就落左去門診果度睇電視嘞!睇到10點,我地話婆婆應該完事了,所以啟程返上房,我就返屋企lu!
返到屋企,心癢癢想整蛋糕,其實個人好累,但個心好想整,好想為自己打打氣!!!我揭揭食譜,都係選了小蛋糕,因我前幾日買左2杯芒果&桃味乳酪,所以今次就整了"芒果乳酪muffin"了!
簡簡單單既材料,我左拌右攪,一會兒麵團已經入爐了.過了一會,陣陣既芒果香從廚房傳出,好香啊!連妹妹都由睡房走出來問我整什麼蛋糕,為可咁香既......唔知桃味會唔會咁香呢???
這幾個小蛋糕,雖然程序簡單,但作為自己既打氣蛋糕,聞到陣陣香味,已經達到目的了!!!當然,明早屋企人既早餐有著落了,哈!

食譜如下:(改良自為食貓網) 整到大約9個小蛋糕

普通麵粉(或自發粉) 150克

發粉(如用自發粉，不用加發粉) 1/2湯匙

梳打粉 1/3茶匙

蛋 1隻

芒果乳酪 150毫升

糖 75克

已溶無鹽牛油 3湯匙

芒果香油 少許


1. 預熱焗爐至200度C。
2.將麵粉,發粉梳打粉過篩兩次。
3.然後將糖 ,蛋,牛油,乳酪,香油逐一加入拌好，攬至冇粒粒 。
4.鋪紙杯放入焗盤，倒入麵粉糊至八成滿，入焗爐12-15分鐘即成 。